في مديح اللغة الخائنة! عن الكتابة بالدارجة الجزائريّة

• (سأقوم بكتابة الألفاظ الأجنبية فقط داخل النص، أما تحويرات العربية فأثق في القارئ أن يصل إليها).
• مانيش حاب نبدا نطلب السماح م حتى واحد، مالجري كو (على الرغم من أنّ) الناس تعوّدو يديروها كي يهدرو ف هاد الموضوع. رح نكتب واش نكتب، وياخويا افهمو كيما تحب!
• راح نسيي نكتب بالدارجة مالجري عندي دوكا 3 سنين عايش برّا، نسيت اللهجة وما نعرفش الهدرات الجديدة تاع لمصاغر.
• كاين عفايس بزاف ف هاد لارتيكل (المقال) حطيتهم بطريقة ما يبانوش م لقراية لولّا، سورتو (خاصّة) خصائص اللهجة تاعنا، فبالاك لو كان تقرا المقال كتر من مرّة رح يكون خير. هادو 3 حوايج حبيت نبدا بيهم.

المشكلة تبدا كي نديسيديو (نقرر) بلي حابين نفهمو "الواقع". حابين نقراو عليه ولا نكتبو. واش نديرو؟ كلّنا نروحو للغة وحدوخرا، لعربية عند لابلوبار (الأكثرية)، شوية لفرونسي، قليييل للونجلي، هاد الشي يعني بلّي رانا نعترفو بيهم لغات يقدرو يفهمو الواقع ديالنا، خير م الدارجة.

قدرو نكتبو كتابات باللهجة تاعنا، عادي. لكن بالاك لي ما خممناش فيه هو بلّي لهجتنا، كيما قع اللغات، هيا الشي الوحيد لي نفهمو بيه ظواهر العالم هادا، ونتفاعلو معاها (حنا نقاربو العالم لغويا كيما يقولو تاع الفلسفة).

مي لبروبلام (المشكلة) ماشي هنا، هادا بالاك (ربّما) ماشي بروبلام قع! لبروبلام لكبير يبان كي تروح للغة وحدوخرا تسيي تفهم/تعبّر بيها على حياتك. حياتك لي مبنية على لغة وحدوخرا خلاص! تروح للعربية والفرنسية باش تفهم واقعك لي عايش بيه بالدارجة.